База на податоци за згради, фасади, скулптури, споменици, фонтани и други видови објекти финансирани од јавни пари, кои го сочинуваат новиот лик на Скопје.
Групната скулптура „Основачите на Македонската револуционерна организација“ е подигната од страна на општина Центар, на иницијатива на Министерството за култура.
Споменикот подигнат во паркот „Жена - борец“ во близина на Собранието на Македонија е посветен на шесттемина основачи на Македонската револуционерна организација: Даме Груев, Христо Татарчев, Петар Поп Арсов, Иван Хаџи Николов, Андон Димитров и Христо Батанџиев.
Автор на споменикот е велешкиот скулптор Ангел Коруновски, кој на конкурсот од четири пријавени труда ја освои втората и изведбена награда од 250.000 денари. Коруновски потоа склучува договор за изведба на групната скулптура со општина Центар во висина од 220 илјади евра во кои е вклучен авторски хонорар од 60 илјади евра, менаџирање, соработници, хала, изработка на моделите и гипсените калапи.
И овој споменик, заедно со уште седум други поставени од општина Центар во центарот на градот, е леен во италијанската леарница „Маринели“, иако другите понуди на јавниот тендер биле пониски.
Прифатената понуда за леење на „Основачите на МРО“ на италијанската леарница била била за 179% повисока од понудата на „РЖ Институт“ Скопје, забележува ревизијата на учеството на општина Центар во проектот „Скопје 2014“, изготвена од Слаѓана Тасева и Драган Малиновски.